MIUI 8 မှာပါဝင်လာတဲ့ Second Space လုပ်ဆောင်ချက်

Hello MIUI-er's,
Xiaomi ဟာ Update အသစ်ထွက်တိုင်း ထူးခြားဆန်းတဲ့ လုပ်ဆောင်ချက်လေးတွေ ထည့်သွင်းပေးတတ်တာကို ကျွန်တော်တို့အားလုံး သိပြီးသားဖြစ်မှာပါ။ ဒါကြောင့် ဒီတစ်ချိန်မှာလည်း အခြားသော Android Platform တွေမှာ မပါဝင်သေးတဲ့ ထူးခြားတဲ့ လုပ်ဆောင်ချက်အသစ်တစ်ခုကို ထည့်သွင်းပေးခဲ့ပါတယ်။ အဲ့ဒါကတော့ MIUI V8 မှာ အသစ်ပါဝင်လာတဲ့ "Second Space (ဒုတိယနေရာ)" ဆိုတာလေးပဲ ဖြစ်ပါတယ်။ Windows OS တွေမှာဆိုရင် တစ်ခုက ရုံးသုံးအကောင့်၊ တစ်ခုက အိမ်သုံးအကောင့်ဆိုပြီး အကောင့်တွေအများကြီးထားလို့ရတာ သတိပြုမိကြမှာပါ။ အဲ့ဒါနဲ့ အလားသဏ္ဍန်တူတဲ့ MIUI 8 မှာပါလာတဲ့ Second space ဆိုတဲ့လုပ်ဆောင်ချက်ကိုသုံးပြီး မတူညီတဲ့ အက်ပလီကေးရှင်းတွေ၊ ဓာတ်ပုံတွေ၊ ဖိုင်တွေနဲ့ သီးသန့်တစ်နေရာ ဖန်တီးနိုင်ပါတယ်။ ဖုန်းတွင်းပိုင်း ဆက်တင်တွေကိုလည်း သက်သက်ချိန်ညှိထားလို့ရပါတယ်။ ဆိုလိုတာက နောက်ထပ်ဖုန်းတစ်လုံးကို သုံးနေရသလိုပါပဲ။ အံ့ဩသွားသလား...... အသေးစိတ်ထပ်ပြီး ရှင်းပြပေးပါ့မယ်။ 
ကျွန်တော်တို့အားလုံးဟာ ဖုန်းကို ပုံသေသတ်မှတ်ချက်အနေနဲ့ Main space (အဓိကနေရာ) မှာပဲ အသုံးပြုနေကြတာပါ။ App တွေ၊ ဓာတ်ပုံတွေ၊ သီချင်းတွေနဲ့ အခြားသောဖိုင်တွေကို အဓိကနေရာမှာပဲ သိမ်းဆည်းထားပါတယ်။ အဓိကနေရာမှာရှိနေတဲ့ဒေတာတွေ မပါဘဲနဲ့ နောက်ထပ်နေရာလွတ်တစ်ခု ထပ်ရမယ်ဆိုရင် ဘယ်လိုနေမလဲဗျ.... ဆိုလိုတာက သင့်မှာ ဖုန်းအသစ်တစ်လုံးရှိနေသလိုမျိုး ဒုတိယနေရာတစ်ခုရှိနေမယ်ဆိုရင်ပေါ့။ သိပ်မရှင်းသေးဘူးလား။ ကျွန်တော်သဘောပေါက်ပါတယ်.... ဒါကြောင့်လည်း ဒီလုပ်ဆောင်ချက်နဲ့ပက်သက်ပြီး ရှင်းပြပေးမယ့်အချိန်မှာ ကျွန်တော်ပုံလေးတွေနဲ့ ရှင်းပြပေးမှာပါ။

Second Space (ဒုတိယနေရာ) ကိုသုံးဖို့ ဘယ်လိုစမလဲ
Settings --> Second Space ထဲကိုဝင်ပါ။
အထဲရောက်ရင် "Turn on Second space" ဆိုတာကို နှိပ်လိုက်ပါ။ (ပုံ - ၁)

အောက်မှာပြထားတဲ့ နောက်ထပ်နေရာလွတ်တစ်ခုဖြစ်တဲ့ Second space ထဲကို ရောက်သွားပါပြီ။ (ပုံ - ၂)

Second space ဖွင့်ပြီး ဆက်လက်လုပ်ဆောင်ရမယ့်အချက်များ
"Manage" ဆိုတာကိုနှိပ်ပြီး အောက်ကပုံလေးတွေအတိုင်း လိုက်လုပ်ပေးပါ။ (ပုံ - ၃ နဲ့ ပုံ - ၄)

Password (လျို့ဝှက်နံပါတ်) သတ်မှတ်ပေးပြီးတာနဲ့ "Next" ကိုနှိပ်ပြီး အောက်မှာပြထားတဲ့ပုံလေးတွေအတိုင်း ရှိနေချင်တဲ့ ဖိုင်တွေ၊ ဓာတ်ပုံတွေ၊ သီချင်းတွေကို Second space ဆီကို တင်သွင်းပါ။ (ပုံ - ၅)

ကဲ... လျှို့ဝှက်နေရာဖြစ်တဲ့ Second space အတွက် သတ်မှတ်စရာတွေ ပြီးပါပြီ။ (ပုံ - ၆)

ဆက်တင်တွေကို ပြန်ပြောင်းချင်ရင်လည်း အောက်ကပုံထဲမှာ ပြထားတဲ့အတိုင်း Manage ထဲကိုဝင်ပြီး စိတ်ကြိုက်ပြင်ဆင်သတ်မှတ်နိုင်ပါတယ်။ (ပုံ - ၇)

နောက်ပိုင်းမှာ ဒေတာတွေ ပြောင်းချင်ရွှေ့ချင်တယ်ဆိုရင် Home screen ပေါ်မှာရှိတဲ့ Move Data ထဲဝင်ပြီး First space မှာရှိတဲ့ ဘယ်ဒေတာကိုမဆို Second space ထဲကို ပြောင်းနိုင်ရွှေ့နိုင်ပါတယ်။ (ပုံ - ၈)

Move Data ထဲဝင်လိုက်ရင် App settings ဆိုတာလေးကို တွေ့ရပါလိမ့်မယ်။ အဲ့ဒီ App settings ထဲမှာ App တစ်ခုချင်းစီကို First space မှာသုံးမလား၊ Second space မှာသုံးမလား၊ ဒါမှမဟုတ် Space နှစ်ခုစလုံးမှာ သုံးမလားဆိုတာ ရွေးနိုင်ပါတယ်။ အောက်ကပုံလေးတွေထဲမှာ ကျွန်တော် နမူနာအနေနဲ့ ထားပြထားပါတယ်။ (ပုံ - ၉)

First space ကို ဘယ်လိုပြန်သွားမလဲ
Space တစ်ခုနဲ့တစ်ခု အကူးအပြောင်းလုပ်ဖို့က နည်းလမ်းနှစ်နည်း ရှိပါတယ်။

ပထမနည်းလမ်း
Home screen ပေါ်မှာရှိတဲ့ Switch space icon လေးကိုနှိပ်ပြီး First space နဲ့ Second space နှစ်ခုဆီကို အပြန်အလှန် သွားနိုင်ပါတယ်။

Second space မှ First space (ပုံ - ၁၀)
First space မှ Second space (ပုံ - ၁၁)

ဒုတိယနည်းလမ်း
ဖုန်းကို Lock လုပ်လိုက်ပါ။ ကိုယ်ဝင်ချင်တဲ့ Space ဆီကို ဝင်ဖို့အတွက် သက်ဆိုင်ရာ Space တစ်ခုချင်းစီရဲ့ Password ကို ရိုက်ထည့်ပေးပါ။
First space ထဲဝင်ချင်တယ်ဆို First space ရဲ့ Password or Pattern ကို ထည့်ပေးပါ။ Second space ထဲဝင်မယ်ဆိုရင်တော့ Second space ရဲ့ Password or Pattern ထည့်ပေးရုံပါပဲ။

ကျွန်တော့်အနေနဲ့ကတော့ ဒုတိယနည်းလမ်းကို ပိုသဘောကျပါတယ်။ Lock screen ကနေ ကိုယ်ဝင်ချင်တဲ့ Space ဆီကို တန်းဝင်လို့ရလို့ပါ။

Second Space ကို ဘယ်လိုဖျက်မလဲ
ဟုတ်ကဲ့။ တကယ်လို့ Second space ကို ပြန်ဖျက်ချင်ပြီဆိုရင်လည်း သိပ်ခက်ခက်ခဲခဲလုပ်စရာမလိုဘဲ ဖျက်ပစ်လို့ရပါတယ်။
"Manage" ကိုဖွင့်ပါ။ အောက်ကိုပွတ်ဆွဲလိုက်ပြီး Delete ဆိုတဲ့ လုပ်ဆောင်ချက်ကို ရှာပါ။ တွေ့ရင် နှိပ်လိုက်ပါ။သင့်ကို ဖျက်မလားဆိုတဲ့ သတိပေးချက်တစ်ခု ပေါ်လာပါလိမ့်မယ်။ Continue ကိုဆက်နှိပ်ပေးပါ။ (ပုံ - ၁၂)

အောက်မှာပြထားတဲ့ပုံလေးထဲကအတိုင်း Second space ထဲက ကိုယ်ရွှေ့ထားချင်တဲ့ဒေတာတွေကို First space ဆီကို ပြန်ရွှေ့ထားလို့ ရပါတယ်။ ပြီးရင် Continue ကိုနှိပ်လိုက်ပါ။ (ပုံ - ၁၃)

အခုဆိုရင်တော့ လျှို့ဝှက်နေရာတစ်ခုလို လုပ်ထားတဲ့ Second space ကို ဖျက်ပစ်လိုက်ပြီဖြစ်ပါတယ်။

Second Space ကို ဘယ်လို အကျိုးရှိရှိ အသုံးချမလဲ
ဒီမေးခွန်းအတွက် အဖြေကတော့ အမှန်အတိုင်းပြောရရင် သုံးစွဲသူအပေါ်မှာပဲ မူတည်ပါတယ်။ ကျွန်တော်ကတော့ ဒီလုပ်ဆောင်ချက်ဟာ ဘယ်လိုအလုပ်လုပ်လဲဆိုတာကိုပဲ တိတိကျကျ ပြောပြပေးနိုင်မှာပါ။ ဆိုကြပါစို့.... သင်ဟာ ဒီဟာနဲ့ အလားသဏ္ဍန်တူတဲ့ Child mode သို့ Guest mode လိုမျိုး သုံးမယ်ဆိုပါစို့။ သင်ဟာ App တစ်ချို့ကိုတော့ ခွင့်ပြုချက်ပေးရမှာပါပဲ။ အဲ့ဒီအခါ အခြားသုံးတဲ့သူတွေက သူတို့ကို သင်ဟာ ကန့်သတ်ပြီးမှ ပေးတယ်ဆိုတာကို သိနိုင်ပါတယ်။ ဒါပေမယ့် "Second space" ကို သုံးမယ်ဆိုရင်တော့ သင်ဟာ သင်ကိုယ်တိုင်အတွက် လျှို့ဝှက်နေရာတစ်ခုကို ပြုလုပ်ထားသလို ဖြစ်နေမှာ ဖြစ်ပြီး ဒါကို သင်ကိုယ်တိုင်ကလွဲပြီး ဘယ်သူမှလည်း သိမှာမဟုတ်ပါဘူး။ နောက်ပြီး သင့်သူငယ်ချင်းတွေကိုလည်း First space ကို ပေးသုံးထားတာဖြစ်တဲ့အတွက် သူတို့ကို ကန့်သတ်ထားတယ်ဆိုတာကို သိကြမှာမဟုတ်ပါဘူး။

Credits: MIUI 8 Developers, you guys really rock!!
Thanks and Regards,
Raaj

Credit to Original post owner from MIUI Global Forum. (ပို့စ်လင့်တင်ပေးဖို့အတွက် ဆာဗာဒေါင်းနေလို့ ဝင်လို့မရလို့ပါ)

တွေးမိသမျှ ယူနီကုဒ်အကြောင်း (၁)

သူများနိုင်ငံတွေမှာလည်း သက်ဆိုင်ရာ ဖုန်း၊ မော်ဒယ်အလိုက် သူ့အဖွဲ့နဲ့လေးတွေနဲ့သူ ရှိပါတယ်။ အဲ့ဒီအဖွဲ့လေးတွေထဲကို ဝင်ကြည့်လိုက်ရင် ဖုန်းမှာဖြစ်နေတဲ့ ဘက်ထရီပြဿနာတို့၊ ဖုန်းရဲ့လုပ်ဆောင်ချက်အကြောင်းတို့၊ Tweaks လေးတွေ ဘယ်လိုသုံးရမလဲလို့ဆိုတာကို နည်းပညာဖြန့်ဝေကြ၊ မေးကြ၊ ဖြေကြနဲ့ ပညာရပါတယ်။ ဒီနိုင်ငံမှာလည်း အဲ့လိုအဖွဲ့တွေ မရှိဘူးမဟုတ်ပါဘူး.... ရှိပါတယ်။ ဒါပေမယ့် ဖုန်းအခက်အခဲကိုမေးတာ နည်းနည်း၊ ဖောင့်အကြောင်းပဲမေးတာများများ ဖြစ်နေတယ်။ မယုံရင်ဝင်ကြည့်ကြည့်.... ဒီနိုင်ငံက အဖွဲ့တွေထဲကို။ ပို့စ် ၁၀ ခုမှာ ၇ ခုက မြန်မာစာမမှန်လို့ ကူပါဦးတို့၊ ဒါလေး အပ်ဒိတ်ပေးနေတယ်... တင်လိုက်ရင် မြန်မာစာပျောက်သွားနိုင်လားတို့ဆိုတာတွေချည်းပဲ တွေ့နေတယ်။ သူများနိုင်ငံတွေက အဖွဲ့တွေထဲမှာ ဖောင့်အကြောင်းမေးတာ တွေ့ကိုမတွေ့ဖူးဘူး... လိုက်ကြည့်ရသလောက်ကတော့။ သူတို့က ဘာလို့မှန်တာလဲ.... သူတို့က သူတို့နိုင်ငံအတွက် သက်ဆိုင်ရာဘာသာစကားတွေကို ယူနီကုဒ်စနစ်နဲ့ တစ်နိုင်ငံလုံး အသုံးပြုနေကြလို့ပါ။ ယူနီကုဒ်စနစ်ဆိုတာ Android OS, iOS တွေမှာ အသင့်ပါပြီးသား စနစ်တစ်ခုပါ။ ကမ္ဘာပေါ်မှာရှိတဲ့ ဘာသာစကားအားလုံးနီးပါးကို ကုဒ်ပွိုင့်တွေသတ်မှတ်ပြီး ထည့်ပေးထားတာပါ။ အဲ့တော့ ယူနီကုဒ်စနစ်ကို တစ်နိုင်ငံလုံး အသုံးပြုကြတော့ ဖုန်းဝယ်လိုက်တာနဲ့ အသင့်ရေးနိုင်၊ ဖတ်နိုင်ကြတယ်။ ဖောင့်အတွက်၊ စာရိုက်စနစ်အတွက် ဘာမှပူစရာမလို။ ဖုန်းနဲ့ပက်သက်တဲ့ အခြားလုပ်ဆောင်ချက်၊ အခြားသောပြဿနာတွေဘက်ကို အာရုံပိုစိုက်နိုင်တယ်၊ ပိုပြီး ဖြေရှင်းနိုင်ကြတယ်။ အဲ့ဒီမှာ သူတို့ကျတော့ အဲ့လိုအသင့်သုံးနိုင်တယ်။ ကျွန်တော်တို့ မြန်မာနိုင်ငံကျတော့ ဘာလို့မရတာလဲဆိုရင် ရပါတယ်လို့ပဲ ပြောရပါလိမ့်မယ်။ ယူနီကုဒ်စနစ်ထဲမှာ မြန်မာဘာသာစကားအတွက် အသင့်ပါပြီးသားပါ။ ဗမာဘာသာအပြင် ရှမ်းဘာသာစကား၊ မွန်ဘာသာစကား၊ ကရင်၊ ပအိုးဝ် အစရှိသဖြင့် တိုင်းရင်းသားဘာသာစကားတွေအတွက်ပါ ပါပြီးသားပါ။  ဒါဆို ကျွန်တော်တို့ ဘာလို့သုံးလို့မရတာလဲ ပြန်မေးရင် အဖြေကရှင်းရှင်းလေးပါ။ မသုံးကြလို့ပေါ့။ ဖုန်းဝယ်ပြီးပြီးချင်း ဘူးဖွင့်၊ ပါဝါဖွင့်ပြီး စစတက်လာတာနဲ့ တန်းမြင်ရတာက ယူနီကုဒ်စနစ်ထဲမှာ ပါပြီးသားဖြစ်တဲ့ မြန်မာစာပါ။ ဟင်... အဲ့ဒါကြီးတွေက စာမှမမှန်တာလို့ ထပ်ပြောရင် အဲ့ဒါကမမှန်တာမဟုတ်ပါဘူး။ ကိုယ်တွေနိုင်ငံက လက်ရှိလူသုံးများနေတဲ့ဖောင့်က မမှန်တာပါ။ အဲ့ဒီဖောင့်က ယူနီကုဒ်စနစ်ထဲမှာ ရှိပြီးသား ကုဒ်ပွိုင့်တွေနေရာမှာ မြန်မာစာစာလုံးတွေကို ဖြစ်သလို နေရာချထားခဲ့တာပါ။ အဲ့ဒါကြောင့် သူ့နေရာနဲ့သူ မှန်မှန်ကန်ကန် နေရာချထားတဲ့ စနစ်နဲ့တွေ့တော့ တလွဲတွေပေါ်ကုန်တာပါ။ စနစ်ကမမှန်တာမဟုတ်ပါ။ လက်ရှိလူသုံးများနေတဲ့ဖောင့်က မှားနေတာပါ။ ဒါပေမယ့် အမှားကြာ အမှန်ဖြစ်ဆိုတဲ့အတိုင်း စနစ်တကျ မှန်မှန်ကန်ကန်နဲ့ အသုံးဝင်တဲ့ ကွန်ပျူတာစနစ်သုံး မြန်မာစာတစ်ခု ဖြစ်လာအောင် အချိန်ယူပြင်ဆင်မွမ်းမံနေတဲ့အချိန်အတွင်းမှာ ယူနီကုဒ်စနစ်ထဲက ကုဒ်ပွိုင့်တွေကို ခိုးယူသုံးစွဲထားပြီး ဖြစ်သလိုလုပ်ထားတဲ့ဖောင့်နဲ့ အသားကျနေတော့ အဲ့ဒါကိုပဲ အမှန်မှတ်ပြီး ပြောနေကြတာပါ။ ယူနီကုဒ်စနစ်ကိုသာ သူများနိုင်ငံတွေမှာလို တစ်နိုင်ငံလုံးအသုံးပြုခဲ့မယ်ဆိုလို့ရှိရင် သူများနိုင်ငံတွေမှာလည်း ဒီနေ့၊ ဒီအချိန်မှာ ရနေတဲ့ နည်းပညာတိုးတက်မှုတွေ ကျွန်တော်တို့မြန်မာနိုင်ငံမှာလည်း ရနိုင်ပါတယ်။ ဥပမာလေး ပြောပြပါ့မယ်။ iOS တွေမှာ ပါနေတဲ့ Siri ဆိုတဲ့ ဆော့ဝဲ။ Siri, Show me the weather today (ဒီနေ့ ရာသီဥတုအခြေအနေလေး ပြကြည့်ပါဦး) တို့၊ Where can I buy bus ticket? (ဘက်စ်ကားလက်မှတ် ဘယ်နားဝယ်ရမလဲ) တို့၊ Make a phone call to Marry (မေရီ့ဆီကို ဖုန်းခေါ်ပေးပါဦး) တို့လို အသံနဲ့အမိန့်ပေးလိုက်တာနဲ့ ဖုန်း၊ ကွန်ပျူတာကနေ လိုက်လံလုပ်ဆောင်ပေးနိုင်ဖို့ဆိုတာ ယူနီကုဒ်စနစ်ကိုသာ အသုံးပြုမှရမယ့် နည်းပညာတွေပါ။ (လက်ရှိ ကိုယ်တွေရဲ့ အိမ်နီးချင်းနိုင်ငံတွေဖြစ်တဲ့ ထိုင်းတို့၊ တရုတ်တို့ကတော့ ရနေပါပြီ)။ပါးစပ်က ရွတ်လိုက်တဲ့စကားတွေကို ကီးဘုတ်တစ်ချက် ထိစရာမလိုဘဲ စာသားအဖြစ် ပြောင်းပြီးပြပေးနိုင်ဖို့ဆိုတာ ယူနီကုဒ်စနစ်သုံးမှရမှာပါ။ ဒါတွေက ဥပမာအချို့ပဲ ရှိသေးတာပါ။ အဲ့ထက်လုပ်ဆောင်နိုင်တာတွေ အများကြီးရှိပါသေးတယ်။ ဆိုတော့ကာ.... နည်းပညာတိုးတက်မှုကို လိုချင်ရင်တော့ ယူနီကုဒ်စနစ်ကို မဖြစ်မနေ ပြောင်းသုံးမှ ရပါလိမ့်မယ်။ အခုက ဒီနိုင်ငံမှာဖြစ်နေတာက လိုချင်လိုက်တဲ့ နည်းပညာတိုးတက်မှု၊ သူများနိုင်ငံတွေ ရတာကို အားကျပြီး လိုချင်နေကြတယ်.... အဲ့ဒါရဖို့ အခြေခံအကျဆုံး ယူနီကုဒ်စနစ်ကို ပြောင်းသုံးပါဆိုတော့ မသုံးချင်ကြတော့ဘူး.... စာမမှန်ဘူးဆိုတဲ့ အကြောင်းပြချက်နဲ့။ အကုန်လုံးသာ ယူနီကုဒ်စနစ်ကို အသုံးပြုနေကြရင် အကုန်လုံးက ဒါနဲ့ပဲရေးတဲ့အတွက် မမှန်ဘူးဆိုတဲ့ပြဿနာ မရှိတော့ပါဘူး။ တစ်ယောက်ချင်းစီ အသိစိတ်ဓာတ်ရှိရှိနဲ့ ပြောင်းလဲကြရင် ပိုကောင်းမှာပါ။ ခုက ဘယ်လိုမှ ပြောမရတော့လို၊ ကြာရင် ဒီထက်ပိုဆိုး၊ ပိုနောက်ကျဖို့ပဲ ရှိနေလို့ နိုင်ငံတော်အဆင့်ထိ စာတင်ပြီး ပြောင်းဖို့ လုပ်ဆောင်နေရတာပါ။ အဲ့ဒါကိုလည်း ကိုယ်မလုပ်နိုင်ရင် နောက်ကနေပဲ လိုက်ပါ၊ ဘေးထိုင်ဘုပြောနဲ့ အပြစ်ဝိုင်းမတင်ကြပါနဲ့။ ခုလက်ရှိဖြစ်နေတာက လုပ်နိုင်တဲ့သူတွေက လုပ်သင့်တဲ့၊ ဖြစ်သင့်တဲ့အရာတစ်ခုကို လုပ်ဆောင်နေကြတာကို ဘေးထိုင်ဘုပြောပြီး အပြစ်တင်၊ လူ့ဂဏန်းလုပ်နေကြတဲ့သူတွေ များများလာတာပါ။ ကိုယ်မသိတဲ့ နယ်ပယ်တစ်ခုကို ဝင်မပြောတာ အကောင်းဆုံးပါ။ ပြောချင်ရင်လည်း သိအောင် ဖတ်၊ မှတ်၊ လေ့လာပြီးမှ ပြောသင့်ပါတယ်။ မဟုတ်ရင် ကိုယ်ပဲ ငပေါကြီး ဖြစ်သွားပါလိမ့်မယ်။ နောက်ပြီး မှားနေတဲ့အရာတစ်ခုကို အသေခံကာကွယ်ပေးနေကြတာလည်း လုပ်သင့်တဲ့အလုပ် မဟုတ်ပါဘူး။ ကိုယ်က နည်းပညာနယ်ပယ်မှာ သူများထက် ပိုသိ၊ ပိုတတ်တယ်ဆိုရင် မှန်ကန်တဲ့အရာကို လမ်းပြပေးရမှာပါ။

စာလည်းရှည်သွားပြီ။ တစ်ခါမှ ဒီလောက်အရှည်ကြီး မရေးခဲ့ဖူးဘူး။ တော်သေးပြီ။

• နည်းပညာသမားများ ကိုယ့်လိပ်ပြာကိုယ်လုံနိုင်ကြပါစေ၊
• ကိုယ့်ပညာရပ်အပေါ် ကိုယ်သစ္စာစောင့်သိနိုင်ကြပါစေ၊
• မှန်ကန်တဲ့စနစ်တစ်ခုကို အမြန်ဆုံး အကောင်အထည် ဖော်နိုင်ကြပါစေ၊
• မြန်မာနိုင်ငံလည်း သူများနိုင်ငံများနည်းတူ နည်းပညာ ဖွံ့ဖြိုးတိုးတက်ပါစေ.... လို့ပဲ ဆုတောင်းရင်း။

Xiaomi ရဲ့ Mi Account အသုံးဝင်ပုံ

Xiaomi ဖုန်းတစ်လုံးကို စတင်သုံးစွဲလိုက်ပြီ ဆိုတာနဲ့ မိမိကိုယ်ပိုင် Mi account လေးတစ်ခုတော့ ရှိထားသင့်ပါတယ်။ Mi Account တစ်ခု ဖွင့်လိုက်ပြီဆိုတာနဲ့ မိမိအတွက် Mi Cloud မှာ အချက်အလက်တွေ သိမ်းဆည်းဖို့ Storage ပမာဏ 5 GB ကို အလိုအလျောက် Free ရသွားပြီဖြစ်ပါတယ်။ Mi account လေးက ကိုယ့်ရဲ့ အချက်အလက်တွေကို Mi Cloud နဲ့ချိတ်ဆက်ပြီးတော့ Online မှာ သိမ်းဆည်းပေးထားမှာ ဖြစ်ပါတယ်။ Mi cloud မှာ သိမ်းဆည်းပေးနိုင်တဲ့အချက်အလက်တွေကတော့ အောက်က ပုံထဲကအတိုင်းပါပဲ။

Mi account က ဘယ်လိုအသုံးဝင်သလဲ

၁။ မိမိရဲ့ဖုန်းနံပါတ်တွေ၊ ဖုန်းခေါ်ဆိုမှုမှတ်တမ်း (Call log) တွေကို Mi cloud မှာ သိမ်းဆည်းထားနိုင်ပါတယ်။ ဒါကြောင့် အကြောင်းအမျိုးမျိုးကြောင့် ဖုန်းနံပါတ်တွေ ပျောက်ဆုံးမှုဖြစ်မှာကို စိုးရိမ်စရာ မလိုပါဘူး။ နောက်ဖုန်းတစ်လုံးထဲမှာ Mi acc ပြန်ဝင်ပြီး Sync လုပ်လိုက်တာနဲ့ မိမိဖုန်းနံပါတ်တွေ ပြန်လည်ရရှိလာမှာပါ။

၂။ မိမိဖုန်းထဲက စာသားမက်ဆေ့ချ် (SMS) တွေကိုလည်း Mi Cloud မှာ သိမ်းထားပေးပါတယ်။

၃။ မိမိရဲ့ ဖုန်းထဲက ဓာတ်ပုံတွေကိုလည်း Mi cloud မှာ သိမ်းဆည်းထားပေးပါတယ်။ ဒါကြောင့် ဥပမာ - ဖုန်းကို အကြောင်းကြောင်းကြောင့် Factory data reset လုပ်လိုက်ရင် Mi account ပြန်ဝင်ပြီး Sync လုပ်လိုက်တာနဲ့ Mi Cloud ကနေ မိမိရဲ့ဓာတ်ပုံတွေကို အရာမယွင်းဘဲ ပြန်လည်ရရှိစေမှာပါ။

၄။ မိမိဖုန်းထဲက Notes app ထဲမှာ ရေးမှတ်ထားတဲ့ မှတ်စုတွေကိုလည်း Mi cloud မှာ သိမ်းဆည်းပေးထားနိုင်ပါတယ်။

၅။ ပြက္ခဒိန် (Calendar) ထဲမှာ ကိုယ့်ရဲ့ ဘယ်နေ့ဘာလုပ်မယ်၊ ဘယ်နေ့မှာ ဘာရှိတယ်ဆိုပြီး မှတ်ထားတဲ့အရာတွေကိုလည်း သိမ်းဆည်းထားပေးနိုင်ပါတယ်။

၆။ ဘရောက်ဇာထဲမှာ မိမိမှတ်ထားခဲ့တဲ့ Website တွေရဲ့ Bookmark link တွေကိုလည်း Mi cloud မှာ သိမ်းထားပေးနိုင်ပါတယ်။

၇။ နောက်တစ်ခုက ကျွန်တော်အကြိုက်ဆုံး လုပ်ဆောင်ချက်ပါ။ မိမိဖုန်းထဲမှာ ထည့်သွင်းထားတဲ့ App တွေကို Mi Cloud မှာ သိမ်းထား (Backup လုပ်ထား) ပေးတာပါ။ App တွေကို သိမ်းထားနိုင်ရုံအပြင် Home screen ပေါ်မှာ Backup လုပ်လိုက်တဲ့အချိန်က ထားခဲ့တဲ့ နေရာအတိုင်း Home screen layout ကိုပါ သိမ်းဆည်းထားနိုင်တာပါ။ ဒါကြောင့် ဖုန်းကို Reset ချပြီးရင်ပဲ ဖြစ်ဖြစ်၊ Fastboot rom တင်လိုက်ရလို့ ဖုန်းရဲ့ Internal storage ထဲမှာ App တွေ ပြန်သွင်းဖို့ တစ်ခုမှ မရှိတော့ရင်ပဲဖြစ်ဖြစ် ဒီလုပ်ဆောင်ချက်က အရမ်းအသုံးဝင်တဲ့ လုပ်ဆောင်ချက်တစ်ခုပါ။

၈။ နောက်ပြီး မိမိရဲ့ Mi ဖုန်းပျောက်သွားခဲ့ရင် ဖုန်းထဲမှာ Mi Account ဝင်ထားပြီးသား၊ Find Device function ပါ ဖွင့်ထားပြီးသား ဖြစ်နေရင်၊ အဲ့ဒီ Mi Account ကို အခြား Mi phone တစ်လုံး၊ ဒါမှမဟုတ် ကွန်ပျူတာကနေ ဝင်ပြီး 

- ကိုယ့်ဖုန်းကို ခြေရာခံလိုက်လို့ရပါတယ်၊ 

- ဖုန်းကို Lock လုပ်ပစ်လိုက်လို့ ရပါတယ်၊ 

- ဖုန်းထဲက မိမိရဲ့ ကိုယ်ရေးအချက်အလက်တွေ၊ ဖုန်းနံပါတ်တွေအားလုံးကို ဖျက်ပစ်လိုက်လို့ရပါတယ်။

(Find Device အကြောင်းကို နောက်မှ ပို့စ်တစ်ခု သပ်သပ်ထပ်ရေးပါဦးမယ်။)

ဒါက ကျွန်တော့်ဖုန်းတည်နေရာကို Find Device ဖွင့်ထားတဲ့အချိန်မှာ i.mi.com>> Find Device ကနေ ဝင်ကြည့်ထားတာပါ။ နေရာမှန်ပါတယ်။

၉။ အရေးအကြီးဆုံး သတိပြုရမယ့်တစ်ချက်က မိမိရဲ့ Mi Account နဲ့ချိတ်ဆက်ထားတဲ့ Email သို့ ဖုန်းနံပါတ်နဲ့ Password ကို မှတ်မိနေဖို့ပါပဲ။ ဖုန်းကို Mi Flash tool သုံးပြီး Rom တင်ဖို့ပဲ ဖြစ်ဖြစ်၊ အခြားသောအကြောင်းကြောင့် Factory reset ချဖို့ပဲဖြစ်ဖြစ် ဖြစ်လာခဲ့ရင် တတ်နိုင်ရင် Mi Account လေးကို Sign out အရင်လုပ်ပေးပါ။ ပြီးမှ လုပ်စရာရှိတာ ဆက်လုပ်ပါ။ Sign out မလုပ်ထားခဲ့မိဘူးဆိုရင် Boot ပြန်တက်လာတဲ့အချိန်မှာ Mi account password တောင်းပါလိမ့်မယ်၊ Password ထည့်ပေးနိုင်မှ သုံးလို့ရမှာပါ။ Password မှတ်မိနေရင် ကိစ္စမရှိပေမယ့် Password မမှတ်မိရင် ရှေ့ဆက်ဘာမှလုပ်လို့မရပါဘူး။ Forget password နဲ့ ပြန်ပြောင်းဖို့နည်းပဲ ရှိပါတယ်။ အဲ့လိုပြောင်းဖို့ကလည်း ဖုန်းနံပါတ်နဲ့ Mi account ကို ချိတ်ဆက်ထားရင် အဆင်ပြေပေမယ့် အီးမေးလ်နဲ့ချိတ်ထားရင်က အတည်ပြုကုဒ်ပြန်ပို့တဲ့အခါ ကြည့်ဖို့ အခြားဖုန်း သို့ ကွန်ပျူတာတစ်လုံး လိုပါလိမ့်မယ်။ ဒါကြောင့် မိမိရဲ့ Mi account Password ကို သေချာမှတ်မိနေဖို့က အရေးအကြီးဆုံးအချက်ပါ။

Mi cloud နဲ့ချိတ်ထားတဲ့ Mi account ကို အကျိုးရှိရှိ အသုံးပြုတတ်ကြပါစေဗျာ။

အဆင်ပြေကြပါစေ။

Facebook တွင် See Conversion / ဖောင့်ပြောင်းကြည့်ပါ ဇွတ်ဖော်နည်း

Fb မှာ See Conversion / ဖောင့်ပြောင်းကြည့်ပါ မပေါ်တဲ့သူတွေ translation ကို Burmese ရွေးမရတဲ့လူတွေအတွက်ပါ။ လုပ်တာကတော့ browser ထဲမှာလုပ်ရပါမယ်။ လုပ်ပြီးသွားရင် app မှာ logout လုပ် login လုပ်လို့ ကံကောင်းရင်တော့ See Conversion ပေါ်နေပါလိမ့်မယ်။

1.  https://touch.facebook.com/  ကို Browser မှာဖွင့်ပြီး login လုပ်ပါ (Chrome Browser မှာစမ်းထားပါ တယ်)

2.  https://touch.facebook.com/settings  ကိုသွားပါ (ဒီက copy ကူးဖို့ အဆင်မပြေရင် http://pastebin.com/9zsws2wY  ကိုဖွင့်ကူးပါ)

3. javascript:(function()%7Bels%20%3D%20document.getElementsByName('primarydialect')%3Bfor%20(i%20%3D%200%3B%20i%20%3C%20els.length%3B%20i%2B%2B)%20%7B%20%20els%5Bi%5D.value%20%3D%20'my_MM'%20%7Ddocument.getElementsByTagName('form')%5B0%5D.submit()%7D)() ကို copy ကူးပါ (ဒီက copy ကူးဖို့ အဆင်မပြေရင် http://pastebin.com/9zsws2wY  ကိုဖွင့်ကူးပါ။ ရှေ့က javascript: ဆိုတာလေးက paste လုပ်လိုက်ရင် မပါဘူးဖြစ်နေတတ်ပါတယ် အဲဒီအခါ လက်နဲ့ javascript: ဆိုပြီး ပြန်ရေးပြီမှ enter နှိပ်ပါ။)

4. copy ကူးထားတာကို browser address bar မှာ paste ပြီး enter နှိပ်လိုက်ပါ။

5. Facebook app မှာ logout လုပ်ပါ login ပြန်လုပ်ပါ

6. ဆုတောင်းပါ :P See Conversion ရပါပြီ။

Credict to Ko Thant Thet (Myanmar Unicode Area)

ဒီနည်းလမ်းလေးက မြန်မာယူနီကုဒ်ဧရိယာ (MUA) မှ ကိုသန့်သက်က ပြုလုပ်ပေးထားတဲ့နည်းလေးပါ။ See conversion/ ဖောင့်ပြောင်းကြည့်ပါ ဆိုတာလေးက ဖေ့စ်ဘွတ်ပေါ်မှာရှိတဲ့ ဇော်ဂျီနဲ့စာတွေကို ယူနီကုဒ်အဖြစ်ကို ပြောင်းလဲဖော်ပြပေးတဲ့ လုပ်ဆောင်ချက်လေးပါ။ Facebook အဖွဲ့အစည်းကြီးကနေ တရားဝင် ထည့်ပေးထားတဲ့ လုပ်ဆောင်ချက်ပါ။ တစ်ခါပျောက်သွားခဲ့ပေမယ့် ပြန်ပြီးရအောင်လို့ Manual နည်းနဲ့ Force လုပ်ပြီး ဖျောက်ထားတဲ့လုပ်ဆောင်ချက်ကို ပြန်ခေါ်လိုက်တာပါ။ ယူနီကုဒ်ကို စတင်အသုံးပြုမယ့်သူတွေအတွက် Facebook က ဇော်ဂျီနဲ့ရေးထားတဲ့စာတွေကို ဖောင့်ပြောင်းကြည့်ပါ ဆိုတာလေးနှိပ်လိုက်ရုံနဲ့ အလွယ်တကူ ဖတ်လို့ရလို့ အဆင်ပြေစေပါတယ်။ ကျေးဇူးအထူးတင်ပါတယ်... ကိုသန့်သက်ခင်ဗျာ။

See conversion/ ဖောင့်ပြောင်းကြည့်ပါ ဆိုတာလေး သုံးတာကို အောက်မှာ ပုံလေးနဲ့ပြထားပါတယ်ခင်ဗျာ။

အဆင်ပြေပါစေခင်ဗျာ။

Xiaomi TWRP Flasher

Xiaomi Phone တွေအတွက်ရေးထားတယ်။

TWRP Recovery တွေကို flash ပေးမှာပါ။
fastboot ကနေ ကြိုးထိုး flash ရမှာပါ။
Scan လုပ်ပြီး Device သိမှ flash ပါ။
Flash လုပ်နေတုန်းကြိုးမဖြုတ်ပါနဲ့။
Reboot ကျသွားရင် ဖုန်းကိုဖြုတ်လို့ရပါပြီ။

File Size : 172MB

Password တောင်းရင် thethtweaung လို့ရိုက်ထည့်ပေးပါ။

👉👉👉 DOWNLOAD 👈👈👈

Credict : Ko Thet Htwe Aung

(မူရင်း Developer ၏စာမျက်နှာသို့ သွားရန်)

Xiaomi ဖုန်းများတွင် Google apps များကို ထည့်သွင်းခြင်း

Xiaomi ကထုတ်တဲ့ဖုန်းတွေမှာ တင်ထားတဲ့ MIUI Version အပေါ်မှာ မူတည်ပြီး Google app တွေ တစ်ပါတည်းပါ၊ မပါဆိုတာ ရှိပါတယ်။ MIUI Rom ကို Global version တင်ထားရင် Google service တွေ တစ်ခါတည်း Built-in ပါလာတတ်ပေမယ့် China version တွေမှာတော့ Google service တွေ မပါဝင်ပါဘူး။ သုံးစွဲသူက ကိုယ်တိုင် ထည့်သွင်းပေးရပါတယ်။ ထည့်သွင်းဖို့က Root လည်းမလိုသလို ခက်လည်းမခက်ပါဘူး။

၁။ အောက်က ပေးထားတဲ့ Google Installer apk လေးကို ဒေါင်းလုဒ်ရယူပါ။

Google Installer apk အား ဒေါင်းလုဒ်ရယူရန်

👉👉👉 DOWNLOAD 👈👈👈

၂။ ပြီးရင် ဖုန်းထဲကို ထည့်သွင်းပါ။ သွင်းပြီးရင် ဖွင့်ပါ။ အင်တာနက်ပါ ဖွင့်ထားဖို့ လိုပါတယ်။

၃။ ပုံထဲကအတိုင်း အောက်ဆုံးနားလေးက တရုတ်စာနဲ့အပြာရောင်အဝိုင်းကြီးကို နှိပ်ပါ။ အခြေခံလိုအပ်တဲ့ Google app ခြောက်ခုကို ဒေါင်းလုဒ်ပြုလုပ်သွားပါလိမ့်မယ်။

၄။ တစ်ခုဒေါင်းလုဒ်လုပ်ပြီးတိုင်း မိမိဘာသာမိမိ တစ်ခါ Install လုပ်ရပါတယ်။ Install လုပ်ပြီးတိုင်း Open ကိုမနှိပ်ဘဲ Done ကိုပဲနှိပ်ပေးပါ။ ခြောက်ခုစလုံး ဒေါင်းလို့ သွင်းလို့မပြီးသေးဘဲ App ထဲကနေမထွက်ပါနဲ့။ MIUI ရဲ့ Background process kill လုပ်တဲ့ Process ကြောင့် app ပြန်ပြီး အစကပြန်သွင်းရတတ်လို့ပါ။ ခြောက်ခုစလုံးသွင်းပြီးမှ ထွက်ပါ။

၅။ ပြီးရင် Play store ကိုအရင်ဖွင့်ပါ။ Account Login ဝင်ဖို့ အတွက် Loading လုပ်နေပါလိမ့်မယ်။ ပထမဆုံးအကြိမ်က နည်းနည်းကြာတတ်ပါတယ်။ စိတ်ရှည်ရှည်နဲ့ စောင့်ပေးပါ။ နည်းနည်းကြာရင် Account Login ဝင်ဖို့ပေါ်လာပါလိမ့်မယ်။ Login process ပြီးသွားရင် Play store နဲ့ Play services ကို Background ကနေ Auto Update လုပ်ပါလိမ့်မယ်။ Play store က စဖွင့်ဖွင့်ချင်းကပုံစံမဟုတ်ဘဲ အောက်ကအတိုင်း ပုံစံပြောင်းသွားရင် Google service တွေထည့်သွင်းတာ ပြီးပါပြီ။

အဆင်ပြေကြပါစေ။

MIUI V8 မှာ Built in ပါလာတဲ့ Default Video Editor ကို အသုံးပြုခြင်း

Xiaomi ရဲ့ နောက်ဆုံးထွက် MIUI Version 8 မှာ အရင်ဗားရှင်းတွေနဲ့ မတူဘဲ ပြုပြင်ပြောင်းလဲမှုတွေ အများ ကြီးလုပ်ခဲ့တာကို အသုံးပြုသူ တော်တော်များများလည်း သိပြီးသား ဖြစ်မှာပါ။ အဲ့ဒီ ထပ်ထည့်ထားတဲ့ လုပ်ဆောင်ချက်ကလေးတွေထဲကမှ Video Editor လေးအကြောင်းကို ပြောပြပေးပါမယ်။ ဒီ Editor လေးက အခြေခံကျတဲ့ တည်းဖြတ်ခြင်းတွေကိုပဲ လုပ်နိုင်ပါလိမ့်မယ်။ အဆင့်မြင့်လုပ်ဆောင်ချက်တွေကို မပါပါဘူး။ သိပြီးသားသူတွေကတော့ ကျော်သွားလိုက်ပါခင်ဗျာ။

အရင်ဆုံး Gallery ထဲက Video ဖိုဒါထဲကို ဝင်ပါ။

ဗီဒီယိုဖိုင်တစ်ခုကို ရွေးလိုက်ပါ။ ကျွန်တော် နမူနာ တစ်ခုရွေးပြီး လုပ်ပြပါ့မယ်။

အောက်က Menu ထဲက Edit ကိုနှိပ်လိုက်ပါ။

လုပ်ဆောင်လို့ရတဲ့ Menu လေးတွေကို တွေ့ရမှာပါ။ 

Trim - ဗီဒီယိုဖိုင်လေးထဲကမှ ကိုယ်လိုချင်တဲ့ နေရာလေးတွေကို ဖြတ်ပြီး ယူလို့ရပါတယ်။

Filter - ဗီဒီယိုဖိုင်ထဲကို အရောင်လေးတွေ ထပ်ထည့်ပေးတာပါ။ သူနဂိုပါတဲ့ အရောင်လေးတွေထဲက တစ်ချို့ကိုတော့ ဒေါင်းလုဒ်ပြုလုပ်ပေးရပါတယ်။ ဒီနေရာမှာတော့ China rom သုံးတဲ့သူဆို သူ့ Mi Market ကနေ ဒေါင်းလုဒ်ယူရမှာပါ။ Global rom သုံးတဲ့သူတွေကတော့ အဆင်မပြေပါဘူး။

Text - ဗီဒီယိုထဲမှာ စာရေးတာပါ။ လက်ရှိအချိန်မှာတော့ ဗီဒီယိုအစမှာပဲ ဇာတ်ကားနာမည်ရေးသလိုပဲ ရပါသေးတယ်။ ဖောင့်တွေလည်း ပြောင်းလို့ရပါတယ်။

Audio - ဗီဒီယိုထဲကို နောက်ခံသီချင်းထည့်တာပါ။ သူနဂိုပါတဲ့ တီးလုံးလေးတွေ ထည့်လို့ရသလို ကိုယ့်ဘာသာကိုယ်လည်း ကိုယ့်ဖုန်းထဲက သီချင်းတွေကို ထည့်လို့ရပါတယ်။ သူနဂိုပါတဲ့ တီးလုံးလေးတွေကတော့ ဒေါင်းလုဒ်ပြုလုပ်ပေးရပါတယ်။ ဒီနေရာမှာတော့ China rom သုံးတဲ့သူဆို သူ့ Mi Market ကနေ ဒေါင်းလုဒ်ယူရမှာပါ။ Global rom သုံးတဲ့သူတွေကတော့ အဆင်မပြေပါဘူး။

အကုန်ပြီးသွားရင် အမှန်ခြစ်လေး နှိပ်ပေးလိုက်ပါ။ Encode လုပ်ပါလိမ့်မယ်။

အောက်က ကျွန်တော် အစမ်းသဘောနဲ့ လုပ်ပြထားတဲ့ဗီဒီယိုဖိုင်လေးပါ။

အားလုံးပဲအဆင်ပြေပါစေ။