ယူနီကုဒ်စနစ် သုံးစွဲသူတစ်ယောက်ဆိုတာ

ယူနီကုဒ်စနစ်ရဲ့ ကောင်းကျိုးတွေကိုတော့ နားမဆန့်အောင် ကြားဖူးပြီး၊ သိထားပြီး ဖြစ်မှာပေါ့။

ဒီတော့ လက်ရှိအချိန်မှာ လူအများစုမှ ခွဲထွက်ပြီး အဲဒီစနစ်ကို စွဲစွဲမြဲမြဲသုံးတဲ့လူတစ်ယောက်အဖို့ရော?

ကျနော် သိသလောက်

ယူနီကုဒ် အသုံးပြုသူတစ်ယောက်၏ ကောင်းကျိုးများ . . .

၁/ မိခင်ဘာသာစကားကို အမှန်တကယ် ချစ်မြတ်နိုးသူ၊ ထိန်းသိမ်းလိုသူ၊ ပြန့်ပွားလိုသူ တစ်ဦးဖြစ်ခြင်း (Love, promote and conserve mother language)

အမျိုး၊ ဘာသာ၊ စာပေကို မြတ်နိုးသူ၊ အနာဂါတ်မျိုးဆက်များ အလွယ်တကူ တူးဖော်ရှာဖွေ စားသုံးနိုင်ရန် စာပေအချက်အလက်များ ချန်ထားခဲ့လိုသူ၊ မြန်မာကို ကမ္ဘာနှင့် ရင်ဘောင်တန်း တွင်ကျယ်စေလိုသူ၊ တိုင်းရင်းသားလူမျိုးများနှင့် ၎င်းတို့၏ ဘာသာစကားများကိုလည်း လေးစားသူ၊ မပျောက်ပျက်အောင် ထိန်းသိမ်းလိုသူ၊ ရေရှည်ကိုကြည့်၍ အနာဂါတ်ကို မျှော်တွေးတတ်သူ၊ အမြင်ကျယ်သူများသာ စံမှီသော မြန်မာစာစနစ်ကိုပဲ သုံးတော့မည်ဟု စိတ်ဒုန်းဒုန်းချ သုံးတတ်ကြသည်။

၂/ ခေါင်းဆောင်စိတ်နှင့် အရည်အသွေး မြင့်မားလာခြင်း (revolutionary and grow leadership skill)

လူအများစုက အပြောင်းအလဲကို လိုချင်သည်ဟု အပြင်ပန်း ပြောတတ်သော်လည်း လက်တွေ့ ကိုယ်တိုင်ကြုံလာသည့်အခါများတွင် တုန်လှုပ်တတ်ကြသည်။ ရှိမြဲလေးအတိုင်း သက်တောင့်သက်သာ နေလိုသည်။ ကမ္ဘာကြီးကို ပြောင်းလဲချင်ပါသည်ဆိုလည်း ကိုယ်တိုင်ကျ အမူအကျင့်လေးတစ်ခုကိုတောင် ပြောင်းဖို့ အင်မတန် ခက်တတ်သည်။ ယင်းကဲ့သို လူများဖြင့် အများညီ၍ 'ဤ' က 'ကျွဲ' ဖြစ်နေသော ယနေ့ခေတ်ကာလတွင် လူအများစုမှ ခွဲထွက် ဆန့်ကျင်တော်လှန်သူများမှာ (ကောင်းသော)အပြောင်းအလဲကို အမှန်တကယ် လိုလားသူ၊ ဦးဆောင် အကောင်အထည်ဖော်သူများဖြစ်သည်။ အများမိုးခါးရေသောက်သည့်တိုင် ရေကြည်တစ်ပေါက်ကိုသာ စွဲစွဲမြဲမြဲ သောက်၍ နီးစပ်ရာကို လက်ဆင့်ကမ်းဖေးမလိုသော စိတ်ဓါတ်ကြံ့ခိုင်သည့် ခေါင်းဆောင်များ ဖြစ်လာသည်။ အချို့က "လူတွေအားလုံးပြောင်းတဲ့နေ့ တို့လည်း ပြောင်းတာပေါ့" ဟု လွယ်လွယ် ဆင်ခြေပြတတ်သေးရာ ထို "လူတွေအားလုံး" ဆိုသောပုဒ်တွင် မိမိလည်းပါနေသည်ကို တကယ် မသိ၍ပေလာ၊ တမင် မသိချင်ယောင် ဆောင်၍ မစဉ်းမစား ဆင်ခြေကန်သည်လော မသိနိုင်။ အထက်ပါ နောက်လိုက်ဆောင်ပုဒ်ကို ဖောက်ထွက်လိုသူအချို့ကတော့ "လူတွေအားလုံးပြောင်းဖို့ဆိုတာ ငါက စပြောင်းမှ ရမယ်"ဟု သဘောပေါက်ပြီး အခြားလူများလည်း ပြောင်းလဲလာအောင် ဦးဆောင်တတ်လာသည်။

၃/ လေ့လာမှုအားကောင်းလာခြင်း (Being open minded and increased learning capacity)

လူအများစုနှင့် ထော်လော်ကန့်လန့်လုပ်ပြီးသုံးရသည့်အတွက် ယင်းအတွက် အကြောင်းပြချက် ခိုင်ခိုင်လုံလုံ ရယူရန် စာဖတ်တတ်လာသည်။ တစ်နည်းအားဖြင့် အချက်အလက်များ ရှာဖွေလေ့လာစူးစမ်းမှု (research) လုပ်တတ်လာသည်။ ခေတ်သမိုင်းအဆက်ဆက် အပြောင်းအလဲတစ်ခုဖော်ဆောင်ရာတွင် ဦးဆောင်သူ၊ တက်ကြွလှုပ်ရှားသူများသည် လက်ရှိစနစ်၏ ဆိုးကျိုးများကို နားလည်စပ်ဆုပ်လာသည်နှင့်တကွ မိမိပြောင်းလဲလိုသည့် စနစ်၏ အားသာချက် အကျိုးရလဒ်များကို ယှဉ်ထိုးကြည့်နိုင်၊ ဝေဖန်ပိုင်းခြားနိုင်သည့်အစွမ်းရှိသူ၊ လေ့လာအားကောင်းသူ၊ စာဖတ်အားကောင်းသူများ ဖြစ်လေ့ရှိသည်။ အခြားတစ်ချက်မှာ ပြောင်းလဲလိုသည့် စနစ်သစ်၏ ကောင်းကျိုးများ အကြောင်း အခြားလူများကို ရှင်းပြလိုသည့် စေတနာအလျောက် ပိုနားလည်အောင် အားထုတ်လာသည်။ ခေတ်စနစ်နှင့် နိုင်ငံရေး၊ နည်းပညာ ပြောင်းလဲ တိုးတက်မှုများကို ယခင်က နားမလည်စိတ်မဝင်စားသူများပင် တီးခေါက်မိလာသည်။

၄/ တွေးခေါ်ဖန်တီးနိုင်စွမ်း မြင့်မားလာခြင်း (increasing creativity)

မိမိ သုံးစွဲသောစနစ်သည် အများပြည်သူ ရည်ရှည် အကျိုးများမည့်စနစ်ဟု ယုံကြည်သည့်အလျောက် ထိုစနစ်ကို ဘယ်လိုဘယ်ပုံ အံဝင်အောင် အသုံးချမည်၊ လူအများ လက်ခံအောင် ဘယ်လို ဆွဲဆောင်မည် စသဖြင့် တွေးတော စဉ်းစားတတ်လာသည်။

၅/ စိတ်ရှည်လာခြင်း၊ သည်းခံနိုင်စွမ်းအား မြင့်မားလာခြင်း

(သို့မဟုတ်) ခန္ဒီပါရမီ နှင့် ဥပေက္ခာ ပါရမီ ရင့်သန်လာခြင်း (Better understandability, more mature, persevere and stronger)

လူအများမှ ဟားတိုက်ခြင်း၊ စောင်းမြောင်းကဲ့ရဲ့ခြင်း၊ ဝေဖန်ပြစ်တင်ခြင်း၊ သင်းကွဲသဏ္ဍာန်လုပ် ရွာပြင်ထုတ်ခြင်းများကို ရင်နှင့်ခံစား၍ ဝမ်းမနည်းတတ်တော့ပဲ လစ်လျူရှုလာနိုင်ခြင်း၊ ဟာသအဖြစ် ရှုမြင်လာခြင်းတို့ ဖြစ်လာသည်။ တစ်နည်းအားဖြင့် 'အရေ' ထူလာသည် ဆိုရမည်။ ထိုမှတစ်ဆင့် အဆင့်မြင့်လာ ပါက ယင်းသို့ပြောဆို ငြိုငြင်သူများကိုပင် မသိနားမလည်သူများအဖြစ် စာနာသနားခြင်း၊ ဂရုဏာသက်ခြင်းတို့ ဖြစ်လာသည်။

၆/ စည်းရုံးရေး စွမ်းရည်နှင့် ဈေးကွက်ချဲ့ထွင်အားများ တိုးတက်လာခြင်း (improvement of organizing and marketing skills)

စီးပွားရေးလုပ်ငန်းနယ်ပယ်မှ မဟုတ်သည့်တိုင် မိမိသုံးစွဲနေသည့်စနစ်ကို လူအများနားလည်လက်ခံအောင် ရှင်းပြလိုသည့်စေတနာအလျောက် စကားပြောစွမ်းရည်၊ စည်းရုံးရေးစွမ်းရည်များ တိုးတက်လာသည်။

၇/ အခြားဘာသာ၊ အထူးသဖြင့် အင်္ဂလိပ်ဘာသာစကား စွမ်းရည် တိုးတက်လာခြင်း (Improving language skill)

မိမိအသုံးပြုနေသည့် စနစ်မှန် ပိုမိုကျယ်ပြန့်လိုသည့်စေတနာအလျောက် ဘာသာပြန်ကဏ္ဍများတွင် တက်တက်ကြွကြွပါဝင်ကူညီခြင်းအားဖြင့် ဘာသာစကားနားလည်မှု စွမ်းရည် တိုးတက်လာသည်။ တစ်ဆက်စပ် တည်းအားဖြင့် စာလုံးပေါင်းသတ်ပုံ၊ သဒ္ဒါ၊ ဝါကျ အထားအသိုများကို ယခင်ကထက် ပိုမို ဂရုစိုက်တတ်လာသည်။

၈/ အပေါင်းအသင်း မိတ်ဆွေအချို့ ဆုံးရှုံးသွားသော်လည်း တစ်ဖက်တွင် မိတ်ဆွေသစ်များ တိုးပွားလာခြင်း (Being able to filter true friendship and expand the social network)

တစ်ဆင့်ခံ စာလုံးပြောင်းလဲမှုများ၊ ဖန်သားပြင်ဓါတ်ပုံများအသုံးပြုရသဖြင့်  မတူညီသောစနစ်မှ သူငယ်ချင်းမိတ်ဆွေများနှင့် ဆက်သွယ်ရာတွင် အချက်အလက်များ ဖောင်းပွ (နှစ်ခု၊ နှစ်ခု ဖြစ်နေ)ကာ ရှေးယခင်ကလောက် မသွက်လက်နိုင်ပေ။ ကိုယ်တိုင်လည်း ကြာလာသည်နှင့်အမျှ ထိုလုပ်ငန်းကို ငြီးငွေ့လာတတ်သည်။ ထိုမှတစ်ဆင့် အဆက်အသွယ် ကျဲပါးကာ သူငယ်ချင်းအချို့ ဆုံးရှုံးနိုင်သည်။ ထို့ပြင် မိမိအသုံးပြုသည့်စနစ်ကိုလိုက်ပါအသုံးပြုရန် ပြောဆိုမိသည့်အခါတွင်တော့ တော်ရုံသာမန် သူငယ်ချင်းများနှင့် အမြင်ကျဉ်းမြောင်းသော မိတ်ဆွေများကိုပါ ထပ်မံ ဆုံးရှုံးရသည်။ အခြားတစ်ဖက်တွင်တော့ အလားတူ စံစနစ်ကို သုံးစွဲနေသည့် နယ်ပယ်ပေါင်းစုံမှ သူငယ်ချင်း မိတ်ဆွေများ တိုးပွားလာသည်။ ထိုမိတ်ဆွေသူငယ်ချင်းများမှာ အထက်တွင် ဖော်ပြခဲ့သော အရည်အချင်းများနှင့် အထိုက်အလျောက်ပြည့်စုံသူများလည်းဖြစ်ရာ အဆိုးထက် အကောင်းက ပိုများသည် ဆိုရပေမည်။ ၎င်းတို့သည် တစ်နည်းအားဖြင့် မိမိနှင့် စိတ်တူ၊ ကိုယ်တူ၊ အမြင်တူသော မိတ်ဆွေများလည်း ဖြစ်ကြသည်။

အခြားကောင်းကျိုးတွေလည်း ရှိနိုင်သည့်အလျောက် သိသူများက မှတ်ချက်တွင် ထပ်ဖြည့်ရေးသွားပါလေ။

ဇော်ငြိမ်းအေး (ဆေး-၂)

ဇူလိုင် ၂၀၁၆

မူရင်းဝတ္ထုအား ဖတ်ရှုရန်

မူရင်းရေးသားသူ၏စာမျက်နှာသို့ သွားရောက်လည်ပတ်ရန်